حلويات لاكريم
هاد الحلوى اللي غدي نوريكم طريقتها ساهلة و غير مكلفة و كتجي زوينة فالمذاقغدي نحتاجو ليها الجينواز و لاكريم ديال الزبدة و السيرو
و كونو متاكدين انكم ماغدي تلقاو بحالها حتى فبلاصة لانها مجهود شخصي و بالنسبة للاكريم كانت عطاتني الطريقة ديالها واحد السيدة كنعرفها ديال واحد السيد خدام فباتيسري و لكن انا غيرت شوية فالمقادير و الطريقة و كذلك عوضت ماركرين بزبدة لابريري
*مقادير الجينواز
2 بيضات
7 معالق كبار زيت
7 معالق كبار حليب
7 معالق كبار ممسوحين سنيدة (او اقل حسب الذوق)
خمارة
كاس عنبة فورص
2 معالق كبار عامرين مزيان شكلاط غبرة
*الطريقة
نخلطو البيض مع سنيدة مزيان غير بالضراب اليدوي ثم نزيدو الزيت و نخلطو مزيان ثم الحليب و نخلطو ثم نضيف الدقيق و نخلطو و الشكلاط غبرة و نكملو التخلاط و اخيرا نضيف الخمارة و نديرو الخليط في مول مدهون و مرشوش بالدقيق و ندخلوه للفرن راه دغيا كتطيب كتحتاج تقريبا 20 دقيقة حسب الفران
دابا نوجدو لاكريم
*مقادير لاكريم
125 غرام زبدة لابريري (la prairie)
1 فاني
كاس صغير سنيدة ماعامرش
نصف كاس صغير زيت
ربع لتر حليب( =2 كيسان صغار عامرين)
الطريقة*
نخلطو الزبدة مع السكر و الفاني و الزيت مزيان بالباطور حتى تنسجم العناصر و نحسو بالسكر داب ثم نبداو نزيدو الحليب شوية بشوية تقريبا مقدار ملعقة كبيرة كل مرة مع التطراب و فينما زدنا الحليب نطربو مزيان بالباطور حتى تشربو لاكريم تماما عاد نزيدو شوية اخر و نطربو مزيان و هكذا حتى نكملو و تطلع لينا لاكريم مزيان ضروري نتبعو هاد الطريقة باش تنجح لينا لاكريم حيت ايلا زدنا الحليب بزاف ماغديش تشربو لاكريم و منين تطلع نخليوها جانبا ما نحتاجوش نديروها فالثلاجة
*السيرو
كاس صغير الا ربع سنيدة
كاس صغير ماء
عصير نصف حامضة (او شوية فاني)
نديرو كلشي في كسرونة فوق النار و نخليوهم حتى يغلي الخليط شوية و يدوب السكر و نزولوه من فوق النار و نخليوه يبرد
منين تخرج الجينواز من الفران نخليوها تبرد ثم نقلبوها فوق ورق او منديل من الاحسن يكون مرشوش بشوية السكر كلاصي باش ماتلصقش ثم نقسموها على جوج
نديرو الجزء اللي كان الفوق التحت الجهة اللي مقسومة تكون الفوق و نسقيوها مزيان بالسيرو و نديرو طبقة رقيقة ديال لاكريم ثم نديرو النصف الثاني و نسقيو مزيان بالسيرو و نغطيوها كاملة بلاكريم و تزين حسب الرغبة اما بالشكلاط محكوك او فيرميسال او كاوكاو او لوز المهم كل وحدة و ذوقها و اللي متوفر عندها و حتى بين الطبقات يمكن نديرو لوز او كاوكاو او شكلاط
ثم نديرو الحلوى فالثلاجة حتى نبغيوها و قد ما بقات كتولي احسن
راه كتجي زوينة واخا لاكريم مصاوبة بالزبدة راه ما كتڭهمش و كتجي خفيفة حيت فيها الحليب
نتمنى تجربوها و تعجبكم
